<<期望過高累事的蘇媽蘇媽肉骨茶>>
之前一早已經想試呢間位於深水埗嘅肉骨茶，佢標榜地道正宗，而且可無限任加肉骨茶已令我非常之心動。但在香港我暫時都未食到一間好正的東南亞風味嘅肉骨茶，所以今次對想蘇媽蘇媽嘅期望較大。
先講佢店面，古色古香得來環境都算衛生，令我更加覺得佢嘅肉骨茶會係嗰種古早味嘅傳統風味。難得出嚟我哋梗係點晒佢嘅大雜錦肉骨茶（$108），網上d人話一定要食嘅皇帝骨（$48），辣死你嗎（即係椰漿飯）（$40），6串豬牛串燒（$75）和麥芽檸檬薏米水（$23/杯）。 一嚟到佢會比幾碗肉骨茶俾我哋飲下先，但好可惜佢肉骨茶味道偏淡完全都冇胡椒嘅味道，只係有好輕微嘅藥材味, 同我懷念嘅新加坡重口味真係有一大段距離，真係算幾清嘅肉骨茶， 可能呢個係馬拉口味，不過真係算淡，我和同事估計佢係咪就返香港人口味，連辣死你嗎椰漿飯嘅味道都係比較淡，真係完全辣我唔死，我之前響馬來西亞食椰漿飯辣好多同埋味道濃好多，都係果句啦，可能係就返香港人嘅口味掛🙄佢嘅大雜錦入面的豬肚，排骨等都係不過不失冇乜特別，反而豬手同埋雞腳嗰啲肥膩啲嘅都幾好味！但係個皇帝肉真有啲失望，＄48只有三小塊，肉質係冧身啲，但始終係瘦肉，都係有少少鞋，又真係冇乜咁特別，重點係都幾貴。
但佢d串燒就真係幾好味！無論豬肉同牛肉都入味同有咬口，我估啲豬係豬頸肉嚟㗎好爽，沙嗲醬做得唔錯有東南亞嘅風味👍不過整體呢間鋪頭嘅性價比唔高，價錢較貴但係食物就一般，唔係難食但唔會想一食再食。
店名：蘇媽蘇媽肉骨茶
環境：7/10
服務：8/10 （店員態度都好親切，會不斷嚟問使唔使加肉骨茶，不過我哋一致覺得啲肉骨茶冇乜令我想一飲再飲嘅意欲姐）
價錢：5/10 （我哋午餐食咗＄366四人，每人＄92，都唔係食咗好多野，CP值不高)
食物質素： 6/10（口味比較清淡，冇乜嘢特別回味）
整體：6.5/10
地址：深水埗基隆街251號地下
#吃貨玩樂
#蘇媽蘇媽
Search